कोल्हापूर – कसबा बावड्यातील सेवा रुग्णालयात महाराष्ट्र शासनाच्या सार्वजनिक आरोग्य विभागाच्या वतीने सुरू होणाऱ्या आधुनिक वैद्यकीय सुविधांच्या उद्घाटन सोहळ्याच्या निमित्ताने एक वेगळाच वाद उफाळून आला आहे. निमंत्रण पत्रिकेतील नावांच्या क्रमवारीवरून विशेषतः खासदार शाहू महाराज छत्रपती यांच्या स्थानाबाबत अस्वस्थता व्यक्त केली जात आहे.
शनिवार, 26 जुलै रोजी, खासदार डॉ. श्रीकांत शिंदे यांच्या हस्ते रुग्णालयातील एम.आर.आय., सी.टी. स्कॅन, कॅथ लॅब, आय.पी.एच.एल. लॅब अशा अत्याधुनिक यंत्रणांच्या प्रस्तावित योजनांचा शुभारंभ होणार आहे. यासाठी छापण्यात आलेल्या निमंत्रण पत्रिकेत प्रमुख पाहुण्यांच्या नावांची यादी दिली असून, त्यात काहींच्या मते गंभीर आणि प्रतिष्ठेचा मुद्दा निर्माण झाला आहे.
निमंत्रण पत्रिकेनुसार, डॉ. श्रीकांत शिंदे हे कार्यक्रमाचे प्रमुख पाहुणे असतील. त्यांच्यानंतर क्रमशः पालकमंत्री प्रकाश आबीटकर, वैद्यकीय शिक्षण मंत्री हसन मुश्रीफ, राज्यसभा खासदार धनंजय महाडिक, खासदार धैर्यशील माने, आणि सहाव्या क्रमांकावर खासदार शाहू महाराज छत्रपती यांची नावे आहेत.
ही नाममुद्रिका पाहताच राजकीय आणि सामाजिक वर्तुळात संताप व्यक्त करण्यात येत आहे. कोल्हापूरसारख्या सांस्कृतिक आणि ऐतिहासिकदृष्ट्या महत्त्वाच्या जिल्ह्याचे प्रतिनिधित्व करणारे शाहू महाराज, केवळ एक खासदार नव्हे, तर एक आदरयुक्त वैचारिक अधिष्ठान मानले जातात. त्यांच्या नावाला पत्रिकेत केवळ सहाव्या स्थानावर स्थान देण्यात आल्याने अनेकांना हे अवमानास्पद वाटले आहे.
ज्येष्ठ नागरिक, इतिहासप्रेमी आणि स्थानिक कार्यकर्त्यांच्या मते, शाहू महाराज हे केवळ एक राजकीय व्यक्तिमत्त्व नसून, संस्थानी परंपरेचे व आधुनिकतेच्या विचारांचे प्रतीक आहेत. यापूर्वी देखील, कोणत्याही निमंत्रणात त्यांचं नाव अग्रक्रमात दिलं जात होतं, मग यावेळी सरकारने त्यांचा सन्मान का डावलला? असा प्रश्न सोशल मीडियावरही विचारला जात आहे.
"केवळ पदानुसार नव्हे, तर परंपरेनुसारही शाहू महाराजांना प्राधान्य दिलं गेलं पाहिजे. हे केवळ एका व्यक्तीचा नव्हे, तर कोल्हापूरच्या अस्मितेचा प्रश्न आहे," अशा प्रतिक्रिया नागरिकांकडून उमटत आहेत.
दुसरीकडे, आयोजकांच्या वतीने यावर अद्याप कोणतीही अधिकृत प्रतिक्रिया देण्यात आलेली नाही. मात्र, हा मुद्दा अधिक चिघळण्याची शक्यता नाकारता येत नाही, कारण शाहू महाराज हे कोल्हापूरच्या जनतेच्या मनात नम्रतेचा, सामाजिक न्यायाचा आणि आदर्श नेतृत्वाचा प्रतिनिधी म्हणून स्थान राखून आहेत.
यावेळी उपस्थित असलेल्या सर्व मान्यवरांचे महत्त्व नाकारता, "संवेदनशीलता आणि शिष्टाचार पाळणे ही सरकारची जबाबदारी असते. जर प्रोटोकॉल फॉलो केला जात नसेल, तर जनतेत अस्वस्थता निर्माण होणे स्वाभाविक आहे," असे मत स्थानिक एका राजकीय निरीक्षकाने व्यक्त केले.
सेवा रुग्णालयातील अत्याधुनिक यंत्रणांचा शुभारंभ हा जनतेसाठी महत्वाचा टप्पा असला, तरी या उद्घाटन सोहळ्याच्या निमंत्रण पत्रिकेतील नावांच्या क्रमवारीमुळे एक वेगळा राजकीय व सामाजिक वाद उभा राहिला आहे. हे प्रकरण पुढे कसे वळते याकडे सगळ्यांचे लक्ष लागले आहे.